Nortear Ilustrado

Galicia e o Norte de Portugal reforzan o intercambio e a colaboración cultural na terceira edición de Nortear Ilustrado, un encontro en formato de residencia na Illa de San Simón destinada a potenciar o intercambio cultural no ámbito da ilustración e o deseño gráfico entre ambas os dous territorios.

O evento realízase ao abeiro do programa europeo Nortear, desenvolvido pola AECT da Eurorrexión Galicia – Norte de Portugal, da Consellería de Cultura, Educación e Universidade e da Direção Regional de Cultura do Norte de Portugal, destinado a conservar, investigar e difundir a cultura galega e da rexión norte do país veciño. Contará coa participación de Luísa Coelho (Viana do Castelo, 1997), Santy Gutiérrez (Vigo, 1971), María Montes Sueiro (Pontevedra, 1987) e João Rebelo (Porto, 1997), quen desde mañá e até o venres 8 compartirán diferentes actividades orientadas á experimentación colaborativa e á creación dunha peza orixinal individual. A actividade está coordinada por 7H Cooperativa Cutlural.

O programa de actividades do encontro está deseñado co fin de favorecer a convivencia entre creadoras e fortalecer o coñecemento mutuo e os vínculos do sector a ambas as dúas beiras do Miño. O xoves día 7 os participantes recibirán a visita de representantes das entidades participantes do proxecto.

Ese mesmo día os creadores participantes recibirán a visita do alumnado da EASD Pablo Picasso da Coruña e da EASD Antonio Faílde de Ourense, ao que presentarán o seu traballo e con quen compartirán a súa experiencia profesional no sector co fin de abordar os retos e dificultades propias do mundo laboral neste eido creativo.

Participantes

A terceira edición de Nortear Ilustrado reúne a catro creadoras de diferentes xeracións e estilos creativos. Pola banda galega, María Montes Sueiro, ilustradora formada na EASD Pablo Picasso, centra o seu traballo no eido editorial a través do formato dixital. A creadora pontevedresa, que este 2021 publicou La casa de la Moira xunto a Sergio Sánchez Benítez (Editorial Bululú), recibiu o premio ao Libro Mellor Ilustrado na Gala do Libro Galego de 2020 polo poemario ilustrado Irmá Paxaro, escrito por Tamara Andrés.

Pola súa banda, o vigués Santy Gutiérrez, con máis de vintecinco anos de experiencia profesional, combina a creación de viñetas de humor gráfico e caricaturas para múltiples cabeceiras de prensa coa ilustración de libros e cómics para revistas e editoriais, ademais de participar en proxectos do mundo publicitario e audiovisual. Membro fundador do estudo Baobab e expresidente da AGPI (Asociación Galega de Profesionais da Ilustración), entre os seus recoñecementos destaca o Premio Albarelo de Periodismo (2009).

Luísa Coelho, a representante portuguesa, está especializada en ilustración pola Facultade de Belas da Universidade de Porto. Co-fundadora e ilustradora da Truz Truz editora, coa que en 2020 publicou o libro A Geração dos Bancos de Madeira, actualmente traballa como freelence nas áreas da ilustración e o desñeo gráfico.

Compañeiro de promoción da vianense é João Rebelo, quen produce traballos de ilustración de arte postal e fineprint, mesturando o deseño e a textura analóxica coa cor dixital baixo o seudónimo de Lince Rebelo. Participante en numerosas exposicións individuais e colectivas, é  co-coordinador de Cravo.Zine, revista en liña centrada nas artes plásticas.

2ª Edición
Nortear Ilustrado

A illa de San Simón acolleu, entre os dias 8 e 10 de outubro de 2020, a segunda edición do Nortear Ilustrado. Este encontro é concibido e desenvolvido no ámbito do proxecto Nortear en formato de residencia artística na que participan ilustradores galegos e da rexión norte de Portugal. Cabe destacar a importancia do reforzo dos lazos entre as dúas rexións de fronteira a través da creación artística.

Catro recoñecidos ilustradores

Este evento reunirá a catro acreditados profesionais do mundo da ilustración: Iria Fabián e Leo Sousa, polo lado galego, e Francis.co e Eva Halfers, polo lado portugués. Cada un deles desenvolverá, ao longo dos tres dias, unha extensa e variada actividade creativa que inclúe workshops, conferencias ou a produción de obras plásticas.

No ámbito deste evento, cómpre destacar a presencia de alumnos da Escola de Arte e Superior de Deseño Pablo Picasso da Coruña. Para eles, os profesionais participantes desenvolverán un workshop de ilustración. O material producido neste encontro será recollido nunha publicación e tamén incluirase nunha exposición, xunto aos materiais do anterior e de futuros encontros de ilustradores.

Participarou na inauguración o secretario xeral de Cultura da Xunta de Galicia, Anxo M. Lorenzo, o xefe de división da Direção Regional de Cultura do Norte de Portugal, João Ribeiro da Silva; o director da AECT da Eurorrexión Galicia – Norte de Portugal, Xosé Lago; a subdirectora xeral de Bibliotecas e do Libro, Cristina Rubal; e a coordinadora do encontro, Julia Lago.